పెక్కు జనుల గొట్టి పేదల వధియించి

పెక్కు జనుల గొట్టి పేదల వధియించి
డొక్క కొరకు నూళ్ళు దొంగిలించి
ఎక్కడికిని బోవ ఎరిగి యముడు జంపు
విశ్వదాభిరామ వినురవేమ //

పేరు సోమయాజి పెనుసింహ బలుడాయె
మేకపోతుబట్టి మెడను విరువ
కాని క్రతువు వలన కలుగునా మోక్షంబు
విశ్వదాభిరామ వినురవేమ //

ప్రాప్తికలుగు చోట ఫలమిచ్చు దైవంబు
ప్రాప్తి లేని చోట ఫలము లేదు
ప్రాప్తి లేక పసిడి పరమాత్ముడిచ్చునా
విశ్వదాభిరామ వినురవేమ //

బండ మీద చెలమ పాటించి తవ్విన
అలత యెక్కుడౌను ఆశ లేదు
గుంట పట్టు చెలమ కులముద్ధరించురా
విశ్వదాభిరామ వినురవేమ //

బేసి కంటివాని పెంపార మది నిల్పి
పూజ సేయవలెను బుద్ధి నిలిపి
ఆత్మ పూజ కంటె అదనంబు లేదయా
విశ్వదాభిరామ వినురవేమ //

బ్రతుకు నిత్యమనుచు పదరుచు వగమీర
విర్రవీగు వాడు వెర్రివాడు
ప్రాణులెల్ల యముని బారి గొఱ్ఱెలు సుమీ
విశ్వదాభిరామ వినురవేమ //