జాతులందు మిగుల జాతి యేదెక్కువో

జాతులందు మిగుల జాతి యేదెక్కువో
యెఱుకలేక తిరుగ నేమి ఫలము?
ఎఱుక గలుగువాడె యెచ్చైన కులజుండు
విశ్వదాభిరామ వినురవేమ //

జీవు జంపుటెల్ల శివభక్తి దప్పుట
జీవు నరసి చూడ శివుడు గాడె?
జీవుడు శివుడనుచు సిద్ధంబు తెలియరో
విశ్వదాభిరామ వినురవేమ //

టక్కరులను గూడి ఎకసెక్కము లాడ
నిక్కమైన ఘనుడి నీతి చెడును
ఉల్లితోట బెరుగు మల్లెమొక్క కరణి
విశ్వదాభిరామ వినురవేమ //

తనదు నృపతితోడ తనయాయుధము తోడ
అగ్ని తోడ పరుల యాలితోడ
హాస్యమాడు టెల్ల ప్రాణాంతకమౌ సుమ్ము
విశ్వదాభిరామ వినురవేమ //

తనువు ఎవరి సొమ్ము తనదని పోషింప?
ధనము ఎవరి సొమ్ము దాచుకొనగ?
ప్రాణమెవరి సొమ్ము పాయకుండగ నిల్ప?
విశ్వదాభిరామ వినురవేమ//

తనువునందు అగ్ని దరికొని కాలంగ
కాల్చుకొనుట యేమి కర్మమునకొ
కాల్చుకొన్న యంత ఘనుడు తానయ్యెనా
విశ్వదాభిరామ వినురవేమ //