బ్రతుకులన్ని మాయ భవబంధములు మాయ

బ్రతుకులన్ని మాయ భవబంధములు మాయ
తెలివి మాయ తన్ను తెలియ మాయ
మాయ దెలియు వాడు మర్మజ్ఞుడగు యోగి
విశ్వదాభిరామ వినురవేమ//

బ్రహ్మ మనగ వేరె పరదేశమున లేదు
బ్రహ్మ మనగ తానె బట్ట బయలు
తన్ను తానెరిగిన తానె పో బ్రహ్మంబు
విశ్వదాభిరామ వినురవేమ //

భూమి నాది యనిన భూమి ఫక్కున నవ్వు
దానహీను జూచి ధనము నవ్వు
కదనభీతు జూచి కాలుండు నవ్వును
విశ్వదాభిరామ వినురవేమ //

భూమిలోన బుట్టు భూసారమెల్లను
తనువులోన బుట్టు తత్వమెల్ల
శ్రమములొన బుట్టు సర్వంబు తానౌను
విశ్వదాభిరామ వినురవేమ //

మంటి కుండవంటి మాయ శరీరంబు
చచ్చు నెన్నడైన చావదాత్మ
ఘటము లెన్ని యైన గగన మొక్కటె కదా
విశ్వదాభిరామ వినురవేమ //

మంటిలోన బుట్టి మంటిలోన బెరిగి
మంటిలోనె తిరిగి మనుజుడాయె
మన్ను మిన్ను గలుప మనుజుడే తత్వము
విశ్వదాభిరామ వినురవేమ//