సకల తీర్థములను సకల యజ్ఞములను

సకల తీర్థములను సకల యజ్ఞంబుల
తలలు గొరిగినంత ఫలము గలదె
తలలు బోడులైన తలపులు బోడులా
విశ్వదాభిరామ వినురవేమ//

సతుల చూడచూడ సంసారి కాగోరు
సుతులు పుట్ట పుట్ట వెతల బడును
గతులు చెడగ చెడగ కర్మమం చేడ్తురు
విశ్వదాభిరామ వినురవేమ //

సుగుణవంతురాలు సుదతియై యుండిన
బుద్ధిమంతు లగుచు పుత్రు లొప్ప
స్వర్గ మేటి కయ్య సంసారి కింకను
విశ్వదాభిరామ వినురవేమ //

హీనగుణము వాని నిలుసేర నిచ్చిన
ఎంత వానికైన నిడుమ గలుగు
ఈగ కడుపు జొచ్చి యిట్టట్టు సేయదా
విశ్వదాభిరామ వినురవేమ //

హృదయమందు నున్న ఈశుని దెలియక
శిలల కెల్ల మ్రొక్కు జీవులార!
శిలల నేమి యుండు జీవులందే కాక?
విశ్వదాభిరామ వినురవేమ //

హేమనగము చేత నెప్పుడు గలవాడు
వెండి కొండ పైని వెలయువాడు
ఎత్త వలసె బిచ్చ మేమన వచ్చురా
విశ్వదాభిరామ వినురవేమ //

వెళ్ళి వచ్చువాడు వెళ్ళి పోయెడు వాడు

వెళ్ళి వచ్చు వాడు వెళ్ళి పోయెడు వాడు
తేను లేడు కొంచు పోను లేడు
తానదేడ బోనొ ధనమేడబోవునో
విశ్వదాభిరామ వినురవేమ //

వేదవిద్య లెల్ల వేశ్యల వంటివి
భ్రమల బెట్టి తేట పడగ నీవు
గుప్త విద్య యొకటె కులకాంత వంటిది
విశ్వదాభిరామ వినురవేమ //

వేరు పురుగు చేరి వృక్షంబు చెరచును
చీడ పురుగు చేరి చెట్టు చెరచు
కుత్సితుండు జేరి గుణవంతు జెరచురా
విశ్వదాభిరామ వినురవేమ //

వ్యాధి కలిగెనేని వైద్యుని చేతను
మందు దినక కాని మాన దెందు
చెంత దీప మిడక చీకటి వాయునా
విశ్వదాభిరామ వినురవేమ //

వ్రాత వెంట గాని వరమీడు దైవంబు
చేత కొలదిగాని వ్రాతగాదు
వ్రాత కజుడు కర్త చేతకు తాకర్త
విశ్వదాభిరామ వినురవేమ //

శిలను ప్రతిమ జేసి చీకటింటను బెట్టి
మొక్క వలవదికను మూఢులార
ఉల్లమందు బ్రహ్మముండుట తెలియుడీ
విశ్వదాభిరామ వినురవేమ //

లోభివాని జంప లోకంబు లోపల

లోభివాని జంప లోకంబు లోపల
మందు వలదు వేరు మతము గలదు
పైక మడిగినంత భగ్గున పడిచచ్చు
విశ్వదాభిరామ వినురవేమ //

వద్దనంగ పోదు వలెననగా రాదు
తాను చేసి నట్టి దానఫలము
ఉల్లమందు వగవ కుండుటే  యోగంబు
విశ్వదాభిరామ వినురవేమ //

వాక్కు వలన గలుగు పరమగు మోక్షంబు
వాక్కు వలన గలుగు వరలు ఘనత
వాక్కు వలన గలుగు నెక్కుడైశ్వర్యముల్
విశ్వదాభిరామ వినురవేమ //

విద్యలేని వాడు విద్వాంసుల కడను
ఉండగానె పండితుండు గాడు
కొలని హంసలకడ కొక్కెర యున్నట్లు
విశ్వదాభిరామ వినురవేమ //

విన్నవాని కన్న కన్న వాడధికుండు
కన్నవాని కన్న కలియువాడు
ఉన్నతోన్నతుడయి ఉర్వి లోపల నుండు
విశ్వదాభిరామ వినురవేమ //

వెన్న చేత బట్టి వివరంబు దెలియక
ఘృతము గోరునట్టి యతని భంగి
తాను దైవమయ్యు దైవంబు దలచును
విశ్వదాభిరామ వినురవేమ //

మృగమదంబు జూడ మీద నల్లగ నుండు

మృగమదంబు జూడ మీద నల్లగ నుండు
పరిఢవిల్లు దాని పరిమళంబు
గురువులైన వారి గుణము లీలాగురా
విశ్వదాభిరామ వినురవేమ //

మేడిపండ చూడ మేలిమై యుండును
పొట్ట విప్పి చూడ పురుగు లుండు
పిరికివాని మదిని బింకమీ లాగురా
విశ్వదాభిరామ వినురవేమ //

రాతిబొమ్మ కేల రంగైన వలువలు
గుళ్ళు గోపురములు కుంభములును
కూడు గుడ్డ తాను గోరునా దైవంబు
విశ్వదాభిరామ వినురవేమ//

రామనామ జపముచే మున్ను వాల్మీకి
పాపి బోయడయ్యు బాపడయ్యె
కులము ఘనము గాదు గుణమె ఘనమ్మురా
విశ్వదాభిరామ వినురవేమ //

రాము డొకడు పుట్టి రవికులం బీడేర్చె
కురుపతియును బుట్టి కులము చెరచె
ఎవరి మంచి చెడ్డ లెంచి చూచిన తేట
విశ్వదాభిరామ వినురవేమ //

లోను జూడ జూడ లోకాభిరామంబు
బయలు జూడ జూడ బంధనంబు
తన్ను జూడ జూడ తారక బ్రహ్మంబు
విశ్వదాభిరామ వినురవేమ //

మాయ లోన బుట్టి మాయలోన బెరిగి

మాయ లోన బుట్టి మాయలోన బెరిగి
మాయ దెలియలేని మనుజుడేల
మాయ దెలియువాడు మహి మీద ధన్యుండు
విశ్వదాభిరామ వినురవేమ//

మిరెపుగింజ చూడ మీద నల్లగ నుండు
కొరికి చూడలోన చురుకు మనును
సజ్జను లగువారి సార మిట్లుండురా
విశ్వదాభిరామ వినురవేమ //

మురికిలోన బుట్టి మురికిలోన బెరిగి
మురికి తనువు కింత మురిపెమేల
మురికెరుంగ నతడు మురికిలో బుట్టునా
విశ్వదాభిరామ వినురవేమ //

ముక్తిగానలేని మూర్ఖజనులకెల్ల
బట్టబయలు జేసి పరమపదము
దారిజూపు ఘనుడు దైవంబు గాదొకో
విశ్వదాభిరామ వినురవేమ //

ముచ్చు యాత్రకేగి ముల్లె విడుచుగాని
మొక్క పొద్దు లేదు మొనసి యెపుడు
కుక్క యిల్లు సొచ్చి కుండలు వెదకదా
విశ్వదాభిరామ వినురవేమ//

మూఢభక్తి చేత ముక్కంటి పూజింప
మొన్న బోయవాడు ముక్తుడాయె
పూజకేమి తనదు బుద్ధి ప్రధానంబు
విశ్వదాభిరామ వినురవేమ//

మనసు లోని ముక్తి మరియొక చోటను

మనసు లోని ముక్తి మరియొక చోటను
వెదుక బోవువాడు వెర్రివాడు
గొర్రె చంకబెట్టి గొల్ల వెదకినట్లు
విశ్వదాభిరామ వినురవేమ //

మనసులోని పుట్టె మాయసంసారము
మనసు విరిగెనేని మాయ తొలగు
మనసు నిల్పెనేని మహితానె బ్రహ్మము
విశ్వదాభిరామ వినురవేమ //

మాటలాడవచ్చు మనసు నిల్పగరాదు
తెలుపవచ్చు దన్ను దెలియరాదు
సురియ బట్టవచ్చు శూరుడు గారాదు
విశ్వదాభిరామ వినురవేమ //

మాటలాడవచ్చు మర్మము లెరిగిన
పిన్న పెద్ద తనము లెన్నవద్దు
పిన్నచేతి దివ్వె పెద్దగా వెలగదా
విశ్వదాభిరామ వినురవేమ //

మాట లుడుగకున్న మంత్రంబు దొరకదు
మంత్ర ముడుగకున్న మది కుదురదు
మనసు నిల్పకున్న మరి ముక్తిలేదయా
విశ్వదాభిరామ వినురవేమ //

మాను దిద్దవచ్చు మరి వంక లేకుండ
దిద్దవచ్చు రాయి తిన్నగాను
మనసు దిద్దరాదు మహిమీద నెవరికి
విశ్వదాభిరామ వినురవేమ //

బ్రతుకులన్ని మాయ భవబంధములు మాయ

బ్రతుకులన్ని మాయ భవబంధములు మాయ
తెలివి మాయ తన్ను తెలియ మాయ
మాయ దెలియు వాడు మర్మజ్ఞుడగు యోగి
విశ్వదాభిరామ వినురవేమ//

బ్రహ్మ మనగ వేరె పరదేశమున లేదు
బ్రహ్మ మనగ తానె బట్ట బయలు
తన్ను తానెరిగిన తానె పో బ్రహ్మంబు
విశ్వదాభిరామ వినురవేమ //

భూమి నాది యనిన భూమి ఫక్కున నవ్వు
దానహీను జూచి ధనము నవ్వు
కదనభీతు జూచి కాలుండు నవ్వును
విశ్వదాభిరామ వినురవేమ //

భూమిలోన బుట్టు భూసారమెల్లను
తనువులోన బుట్టు తత్వమెల్ల
శ్రమములొన బుట్టు సర్వంబు తానౌను
విశ్వదాభిరామ వినురవేమ //

మంటి కుండవంటి మాయ శరీరంబు
చచ్చు నెన్నడైన చావదాత్మ
ఘటము లెన్ని యైన గగన మొక్కటె కదా
విశ్వదాభిరామ వినురవేమ //

మంటిలోన బుట్టి మంటిలోన బెరిగి
మంటిలోనె తిరిగి మనుజుడాయె
మన్ను మిన్ను గలుప మనుజుడే తత్వము
విశ్వదాభిరామ వినురవేమ//