దిక్కు లేని వాని దీనత బాపిన

దిక్కు లేని వాని దీనత బాపిన
పురుషు డిహము నందె పూజ్యుడగును
పరము నందు వాని భాగ్యమేమనవచ్చు
విశ్వదాభిరామ వినురవేమ //

దూలములను నెక్కి దొమ్మరి గడనెక్క
జాలుదు నన డెపుడు సజ్జనుండు
వీలుమాలు పనులు వెర్రియై చేయునా
విశ్వదాభిరామ వినురవేమ//

ధనము కూడబెట్టి ధర్మంబు చేయక
తాను తినక లెస్స దాచు గాక
తేనె నీగ కూర్చి తెరువరి కియ్యదా
విశ్వదాభిరామ వినురవేమ//

నిక్కమైన మంచి నీల మొక్కటి చాలు
తళుకు బెళుకు రాలు తట్టెడేల
చదువ పద్య మరయ చాలదా యొక్కటి
విశ్వదాభిరామ వినురవేమ//

నిద్ర లోని నిద్ర నిజమని తెలిసిన
భద్ర మగును మిగుల బ్రహ్మవిద్య
నిద్ర తెలియువాడు నిర్మలయోగిరా
విశ్వదాభిరామ వినురవేమ //

నీళ్ళ మునుగ నేల నిధులు మెట్టగనేల
మొనసి వేల్పులకును మొక్కనేల
కపట కల్మషములు కడుపులో నుండగా
విశ్వదాభిరామ వినురవేమ //