కనియు గానకుండు కదలింపడా నోరు

కనియు గానకుండు కదలింపడా నోరు
వినియు వినకయుండు విస్మయమున
సంపదగలవాని సన్నిపాతంబది
విశ్వదాభిరామ వినురవేమ //

కనులు లేనివాడు కాళ్ళుపోయునవాడు
ఉభయు లరయ గూడియుండునట్లు
పేదపేద గూడి పెనగొని యుందురు
విశ్వదాభిరామ వినురవేమ //

కన్నులందు మదము గప్పి కానరుగాని
నిరుడు ముందటేడు నిన్న మొన్న
దగ్ధులైనవారు తమకంటె తక్కువా?
విశ్వదాభిరామ వినురవేమ //

కసరు దినును గాదె పసరంబులెప్పుడు
చెప్పినట్టు వినుచు సేయు పనులు
వాని పాటియైన మానవు డొప్పడా
విశ్వదాభిరామ వినురవేమ//

కర్ణుడొకడెగాని ఘనులెవ్వరును లేరు
దానశీలుడంచు దలప బడను
తలప ధనము కర్ణు దాతను జేసెను
విశ్వదాభిరామ వినురవేమ //

కలిమినాడు నరుడు కాన్పు మదమున
లేమినాడు పెట్ట లేదు మొదలె
కలిమి లేమి లేని కాలంబు కలుగునా
విశ్వదాభిరామ వినురవేమ //