పెక్కు జనుల గొట్టి పేదల వధియించి

పెక్కు జనుల గొట్టి పేదల వధియించి
డొక్క కొరకు నూళ్ళు దొంగిలించి
ఎక్కడికిని బోవ ఎరిగి యముడు జంపు
విశ్వదాభిరామ వినురవేమ //

పేరు సోమయాజి పెనుసింహ బలుడాయె
మేకపోతుబట్టి మెడను విరువ
కాని క్రతువు వలన కలుగునా మోక్షంబు
విశ్వదాభిరామ వినురవేమ //

ప్రాప్తికలుగు చోట ఫలమిచ్చు దైవంబు
ప్రాప్తి లేని చోట ఫలము లేదు
ప్రాప్తి లేక పసిడి పరమాత్ముడిచ్చునా
విశ్వదాభిరామ వినురవేమ //

బండ మీద చెలమ పాటించి తవ్విన
అలత యెక్కుడౌను ఆశ లేదు
గుంట పట్టు చెలమ కులముద్ధరించురా
విశ్వదాభిరామ వినురవేమ //

బేసి కంటివాని పెంపార మది నిల్పి
పూజ సేయవలెను బుద్ధి నిలిపి
ఆత్మ పూజ కంటె అదనంబు లేదయా
విశ్వదాభిరామ వినురవేమ //

బ్రతుకు నిత్యమనుచు పదరుచు వగమీర
విర్రవీగు వాడు వెర్రివాడు
ప్రాణులెల్ల యముని బారి గొఱ్ఱెలు సుమీ
విశ్వదాభిరామ వినురవేమ //

పాలు పంచదార పాపరపండ్లలో

పాలు పంచదార పాపరపండ్లలో
చాలబోసి వండ చవికిరావు
కుటిల మానవులకు గుణమేల గల్గురా
విశ్వదాభిరామ వినురవేమ //

పిండములను జేసి పితరుల దలపోసి
కాకులకును బెట్టు గాడ్దెలార
పియ్యి దినెడు కాకి పితరు డెట్లాయెరా
విశ్వదాభిరామ వినురవేమ //

పిల్లి ఎలుక బట్ట ప్రియమున నుండంగ
అదియ కోడి బట్ట నునుగమించు
మమత విడువకున్న మానునా మోహంబు
విశ్వదాభిరామ వినురవేమ //

పిసినివాని యింట పీనుగు వెడలిన
కట్టె కోలలకును కాసు లిచ్చి
వెచ్చమాయె ననుచు వెక్కి వెక్కేడ్చురా
విశ్వదాభిరామ వినురవేమ //

పుత్తడి గలవాని పుండు బాధయు గూడ
వసుధలోన చాల వార్త కెక్కు
పేదవాని యింట పెండ్లైన నెరుగరు
విశ్వదాభిరామ వినురవేమ //

పూజకన్న నెంచ బుద్ధి ప్రధానము
మాటకన్న నెంచ మనసు దృఢము
కులముకన్న మిగుల గుణము ప్రధానము
విశ్వదాభ్రామ వినురవేమ //

పట్టు పట్టరాదు పట్టి విడువరాదు

పట్టు పట్టరాదు పట్టి విడువరాదు
పట్టెనేని బిగియ పట్టవలయు
పట్టి విడుట కన్న పడి చచ్చుటే మేలు
విశ్వదాభిరామ వినురవేమ //

పదుగురాడు మాట పాటియై ధర జెల్లు
ఒక్కడాడు మాట ఎక్కదెందు
ఊరకుండు వాని నూరెల్ల నోపదు
విశ్వదాభిరామ వినురవేమ //

పరుల మోసపుచ్చి పరధన మార్జించి
కడుపు నింపుకొనుట కాని పద్దు
ఋణము సేయు మనుజు డెక్కువ కెక్కునా
విశ్వదాభిరామ వినురవేమ //

పలుగు రాతిగుండు పగులగొట్టగ వచ్చు
కొండలన్ని పిండి గొట్టవచ్చు
కఠిన చిత్తు మనసు కరగింప రాదయా
విశ్వదాభిరామ వినురవేమ //

పశుల వన్నె వేరు పాలేక వర్ణమౌ
పుష్పజాతి వేరు పూజ యొకటి
దర్శనములు వేరు దైవంబు ఒక్కటి
విశ్వదాభిరామ వినురవేమ //

పాలసాగరమున పవ్వళించినవాడు
గొల్ల యిండ్ల పాలు కోరనేల
ఎదుటి వారి సొమ్ము లెల్లవారికి తీపి
విశ్వదాభిరామ వినురవేమ //

నీళ్ళ మునుగువాడు నిర్మలాత్ముడు గాడు

నీళ్ళ మునుగు వాడు నిర్మలాత్ముడు గాడు
పూర్ణమైన ముక్తి బొందలేడు
నీరుకోడి యెపుడు నీళ్ళను మునుగదా
విశ్వదాభిరామ వినురవేమ //

నీళ్ళలోన మొసలి నిగిడి యేనుగు బట్టు
బయట కుక్క చేత భంగపడును
స్థానబలిమి కాని తన బల్మి కాదయా
విశ్వదాభిరామ వినురవేమ //

నీళ్ళు బోసి కడిగి నిత్యము శోధించి
కూడు వెట్టి మీద కోక గట్టి
ఏమి పాట్లు పడుదు రీ దేహమున కిల
విశ్వదాభిరామ వినురవేమ //

నేరనన్నవాడు నెరజాణ మహిలోన
నేర్తునన్నవాడు వార్త కాదు
ఊరకున్నవాడెఉత్తమోత్తముడయా
విశ్వదాభిరామ వినురవేమ //

నొసలు బత్తుడయ్యె నోరు తోడేలయ్యె
మనసు భూతమట్లు మలయగాను
శివుని గొల్తుననగ సిగ్గెట్ట రాదురా
విశ్వదాభిరామ వినురవేమ //

పందిపిల్ల లీను పదియునైదింటిని
కుంజరంబు ఈను కొదమనొకటి
ఉత్తముడగు పురుషు డొక్కడు చాలడా
విశ్వదాభిరామ వినురవేమ //

దిక్కు లేని వాని దీనత బాపిన

దిక్కు లేని వాని దీనత బాపిన
పురుషు డిహము నందె పూజ్యుడగును
పరము నందు వాని భాగ్యమేమనవచ్చు
విశ్వదాభిరామ వినురవేమ //

దూలములను నెక్కి దొమ్మరి గడనెక్క
జాలుదు నన డెపుడు సజ్జనుండు
వీలుమాలు పనులు వెర్రియై చేయునా
విశ్వదాభిరామ వినురవేమ//

ధనము కూడబెట్టి ధర్మంబు చేయక
తాను తినక లెస్స దాచు గాక
తేనె నీగ కూర్చి తెరువరి కియ్యదా
విశ్వదాభిరామ వినురవేమ//

నిక్కమైన మంచి నీల మొక్కటి చాలు
తళుకు బెళుకు రాలు తట్టెడేల
చదువ పద్య మరయ చాలదా యొక్కటి
విశ్వదాభిరామ వినురవేమ//

నిద్ర లోని నిద్ర నిజమని తెలిసిన
భద్ర మగును మిగుల బ్రహ్మవిద్య
నిద్ర తెలియువాడు నిర్మలయోగిరా
విశ్వదాభిరామ వినురవేమ //

నీళ్ళ మునుగ నేల నిధులు మెట్టగనేల
మొనసి వేల్పులకును మొక్కనేల
కపట కల్మషములు కడుపులో నుండగా
విశ్వదాభిరామ వినురవేమ //

తల్లి యున్న యపుడె తనదు గారాబంబు

తల్లి యున్న యపుడె తనదు గారాబంబు
ఆమె పోవ తన్ను నరయ రెవరు
మంచికాల మపుడె మర్యాద నార్జింపు
విశ్వదాభిరామ వినురవేమ //

తామసించి చేయ తగదెట్టి కార్యంబు
వేగిరింప నదియు విషమ మగును
పచ్చికాయ దెచ్చి పడవేయ ఫలమౌనె?
విశ్వదాభిరామ వినురవేమ //

తాము కన్నవారు,తముగన్నవారును
చచ్చుటెల్ల తమకు సాక్షిగాదె
బ్రతుకుటెల్ల తమకు బ్రహ్మ కల్పంబులా
విశ్వదాభిరామ వినురవేమ//

తిట్టి కొట్టిరేని తిరిగి మాటాడక
అట్టు నిట్టు జూచి అదిరి పడక
తన్నుగాని యట్లు తత్వజ్ఞుడుండును
విశ్వదాభిరామ వినురవేమ //

తేనె తెరల జాడ తేనెటీగ యెరుంగు
సుమరసంబు జాడ భ్రమరమెరుగు
పరమయోగి జాడ భక్తుండెరుంగును
విశ్వదాభిరామ వినురవేమ //

తోలు కడుపులోన దొడ్డవాడుండంగ
రాతిగుళ్ళ నేల రాశి బోయ
రాలు దేవులైన రాశులు మింగవా
విశ్వదాభిరామ వినురవేమ //

తనువు నడవి జేసి తనలోనె కూర్చుండి

తనువు నడవి జేసి తనలోనె కూర్చుండి
తపము చేయలేని తపసు లెల్ల
అడవి యందు జేరి అలజడి పడెదరు
విశ్వదాభిరామ వినురవేమ//

తనువు లస్థిరమని ధనము లస్థిరమని
తెలుపగలడు తాను తెలియలేడు
చెప్పవచ్చు పనులు చేయుట కష్టమౌ

విశ్వదాభిరామ వినురవేమ//

తరువ తరువ బుట్టు తరువున ననలంబు

తరువ తరువ బుట్టు దధిని వెన్న

తలప తలప బుట్టు తనువున తత్వంబు

విశ్వదాభిరామ వినురవేమ //

తప్పులెన్నువారు తండోపతండంబు

ఉర్విజనుల కెల్ల నుండు తప్పు

తప్పులెన్నువారు తమ తప్పులెరుగరు

విశ్వదాభిరామ వినురవేమ //

తల్లి గర్భమందు తాబుట్టినప్పుడు

మొదలు బట్ట లేదు తుదను లేదు

నడుమ బట్ట గట్ట నగుబాటు గాదొకో

విశ్వదాభిరామ వినురవేమ //

తల్లి దండ్రి మీద దయలేని పుత్రుండు

పుట్ట నేమి వాడు గిట్టనేమి

పుట్టలోని చెదలు పుట్టదా గిట్టదా

విశ్వదాభిరామ వినురవేమ //

జాతులందు మిగుల జాతి యేదెక్కువో

జాతులందు మిగుల జాతి యేదెక్కువో
యెఱుకలేక తిరుగ నేమి ఫలము?
ఎఱుక గలుగువాడె యెచ్చైన కులజుండు
విశ్వదాభిరామ వినురవేమ //

జీవు జంపుటెల్ల శివభక్తి దప్పుట
జీవు నరసి చూడ శివుడు గాడె?
జీవుడు శివుడనుచు సిద్ధంబు తెలియరో
విశ్వదాభిరామ వినురవేమ //

టక్కరులను గూడి ఎకసెక్కము లాడ
నిక్కమైన ఘనుడి నీతి చెడును
ఉల్లితోట బెరుగు మల్లెమొక్క కరణి
విశ్వదాభిరామ వినురవేమ //

తనదు నృపతితోడ తనయాయుధము తోడ
అగ్ని తోడ పరుల యాలితోడ
హాస్యమాడు టెల్ల ప్రాణాంతకమౌ సుమ్ము
విశ్వదాభిరామ వినురవేమ //

తనువు ఎవరి సొమ్ము తనదని పోషింప?
ధనము ఎవరి సొమ్ము దాచుకొనగ?
ప్రాణమెవరి సొమ్ము పాయకుండగ నిల్ప?
విశ్వదాభిరామ వినురవేమ//

తనువునందు అగ్ని దరికొని కాలంగ
కాల్చుకొనుట యేమి కర్మమునకొ
కాల్చుకొన్న యంత ఘనుడు తానయ్యెనా
విశ్వదాభిరామ వినురవేమ //

చెడ్డవాని జూచి చెరచును దైవంబు

చెడ్డవానిజూచి చెరచును దైవంబు
అడ్డు పడడు వాని కాపదైన
చెడ్డ చేను జూచి రెడ్డి తా మెచ్చునా
విశ్వదాభిరామ వినురవేమ //

చెప్పులోని రాయి చెవిలోని జోరీగ
కంటిలోని నలుసు కాలిముల్లు
ఇంటిలోని పోరు ఇంతింత కాదయా
విశ్వదాభిరామ వినురవేమ //

చేటు వచ్చెనేని చెడనాడు దైవంబు
మేలు వచ్చెనేని మెచ్చు తన్ను
చేటు మేలు తలప చేసిన కర్మముల్
విశ్వదాభిరామ వినురవేమ //

జడలు దాల్చుటెల్ల జగము ఛీయనుటెల్ల
ఒడలు విరుచుటెల్ల యోగమెల్ల
ముక్తికాంత బట్టి ముద్దాడు కొరకురా
విశ్వదాభిరామ వినురవేమ //

జననమరణములకు తను స్వతంత్రుడుగాడు
మొదట కర్త కాడు తుదనుకాడు
నడుమ కర్తననుట నగుబాటు కాదొకో
విశ్వదాభిరామ వినురవేమ //

జాతి భేదమెంచి జన్మముల్ దెలియక
ముక్తి కానలేరు మూర్ఖ జనులు
జాతులెంచ నేల జన్మంబు తెలియుడు
విశ్వదాభిరామ వినురవేమ //

చదువులన్ని చదివి చాలవివేకియై

చదువులన్ని చదివి చాల వివేకియై
కలుషచిత్తుడైన ఖలుని గుణము
దాలిగుంట కుక్క తలచిన చందమౌ
విశ్వదాభిరామ వినురవేమ //

చావు నేడొ రేపే జతపడి వచ్చును
పెక్కునాళ్ళు కూడబెట్టనేల
అనుచు ఆశ లుడుగు నంతటి వారేరి
విశ్వదాభిరామ వినురవేమ//

చిక్కియున్నవేళ సింహంబునైనను
బక్కకుక్క కఱచి బాధపెట్టు
బలిమిలేని వేళ పంతంబు చెల్లదు
విశ్వదాభిరామ వినురవేమ //

చిత్తశుద్ధి గల్గి చేసిన పుణ్యంబు
కొంచెమైన నదియు కొదువగాదు
విత్తనంబు మర్రి వృక్షంబునకు నెంత?
విశ్వదాభిరామ వినురవేమ //

చిప్పలోన బడ్డ చినుకు ముత్యంబయ్యె
నీట బడ్డ చినుకు నీళ్ళ గలిసె
ప్రాప్తమున్న చోట ఫలమేల తప్పురా
విశ్వదాభిరామ వినురవేమ //

చెమట కారునట్లు శ్రమపెట్టి దేహంబు
గడన చేసి కూడు కుడువవలయు
తల్లి దండ్రి సొమ్ము తాదింట కారాదు
విశ్వదాభిరామ వినురవేమ //

గొడ్డుటావు బిదుక కుండ గొంపోయిన

గొడ్డుటావు బిదుక కుండ గొంపోయిన
పళ్ళనూడ దన్ను పాలనీదు
లోభివాని నడుగ లాభంబు లేదయా
విశ్వదాభిరామ వినురవేమ //

చంపకూడ దెట్టి జంతువునైనను
చంపవలయు లోకశత్రుగుణము
తేలుకొండి కుట్టె తేలేమి చేయురా
విశ్వదాభిరామ వినురవేమ //

చంపదగిన యట్టి శత్రువు తనచేత
చిక్కెనేని కీడు చేయరాదు
పొసగమేలు చేసి పొమ్మనుటె చావు
విశ్వదాభిరామ వినురవేమ //

చంపదలచు రాజు చనవగ్గలంబిచ్చు
చెరుపనున్న పగర చెలిమిసేయు
కరవనున్న పాము నెరిగాచుకొని యుండు
విశ్వదాభిరామ వినురవేమ //

చదువు చదువకున్న సౌఖ్యంబులును లేవు
చదువు చదివెనేని సరసుడగును
చదువు మర్మమెరిగి చదివిన చదువురా
విశ్వదాభిరామ వినురవేమ //

చదువులందుపాడి మొదవులందున స్త్రీల
పెదవులందు రాజ పదవులందు
ఆశలుడిగినట్టి అయ్యలు ముక్తులు
విశ్వదాభిరామ వినురవేమ //

గాలి గాలి కలిసె గగనంబు గగనంబు

గాలి గాలి కలిసె గగనంబు గగనంబు
మన్ను మన్ను గలిసె మంట మంట
నీరు నీట గలిసె నిర్మలంబై యుండె
విశ్వదాభిరామ వినురవేమ //

గుణములు గలవాని కులమెంచగా నేల
గుణము గలిగెనేని కోటి సేయు
గుణము లేక యున్న గుడ్డి గవ్వకు సాటి
విశ్వదాభిరామ వినురవేమ //

గుణయుతునకు మేలు గోరంత జేసిన
కొండయౌను వాని గుణము చేత
కొండ కొద్ది మేలు గుణహీనుడెరుగునా
విశ్వదాభిరామ వినురవేమ//

గురువు లేక విద్య గురుతుగా దొరకదు
నృపతి లేక భూమి తృప్తి గాదు
గురువు విద్య లేక గురుతర ద్విజుడౌనె?
విశ్వదాభిరామ వినురవేమ //

గువ్వ కొరకు మేను గోసి యా శిబిరాజు
వార్త విడువరాక కీర్తి కెక్కె
ఓగు నెంచబోవ రుపకారి నెంతురు
విశ్వదాభిరామ వినురవేమ //

గూబ చేర గృహము గునిసి పాడుగ బెట్టి
వెళ్ళిపోదు రెంత వెర్రివారొ
గూబ గృహము లేమి కూర్చురా కర్మంబు
విశ్వదాభిరామ వినురవేమ //

కోపమునను ఘనత కొంచెమై పోవును

కోపమునను ఘనత కొంచెమైపోవును
కోపమునను మిగుల గోడు గలుగు
కోప మడచె నేని కోరికలీడేరు
విశ్వదాభిరామ వినురవేమ //

కోరి దృపదు పట్టి కొప్పు బట్టీడ్చిన
సింహబలుని చావు చెప్పదరమె
ముగియు కాలమునకు మొనగాడు నీల్గడా
విశ్వదాభిరామ వినురవేమ //

ఖలులు తిట్టిరంచు కలవరపడ నేల
వారి తిట్ల నేమి వాసి చెడును
సజ్జనుండు తిట్ట శాపంబెయౌనురా
విశ్వదాభిరామ వినురవేమ //

గంగ పారుచుండు కదలని గతి తోడ
మురికి కాల్వ పారు మోత తోడ
అధికు డోర్చునట్లు అధముడోర్వగలేడు
విశ్వదాభిరామ వినురవేమ //

గంగి గోవు పాలు గంటెడైనను చాలు
కడివెడైన నేమి ఖరము పాలు
భక్తి గలుగు కూడు పట్టెడైనను చాలు
విశ్వదాభిరామ వినురవేమ//

గాడ్దె మేన నిండ గంధంబు బూసిన
బూదిలోన బడుచు పొరలు మరల
 మోటువాని సొగసు పోలికే ఇది సుమీ
విశ్వదాభిరామ వినురవేమ //

కులము హెచ్చు తగ్గు గొడవలు పనిలేదు

కులము హెచ్చు తగ్గు గొడవలు పనిలేదు
సానుజతమయ్యె సకల గుణము
హెచ్చు తగ్గు మాట లెట్లెరుంగగవచ్చు
విశ్వదాభిరామ వినురవేమ//

కూడు బెట్టకున్న కుక్షిలోజఠరాగ్ని
భక్షణంబు సేయు కుక్షి మలము
కూడు విడిచి మలము గుడుచురా ఉపవాసి
విశ్వదాభిరామ వినురవేమ //

కూర యుడుకు వెనుక కూడునా కసవేర?
యెరుక కలిగి మునుపె యేరవలయు
స్థలము తప్పు వెనుక ధర్మంబు బుట్టునా
విశ్వదాభిరామ వినురవేమ //

కొంపలోన నున్న కోర్కెలు ఛేదించి
హృదయ మట్టె మిగుల పదిల పరచి
గృహము నిల్పువాడు బహుతత్వవేదిరా
విశ్వదాభిరామ వినురవేమ //

కోటి దానమిచ్చి కోపంబు సేయుచో
పాటి సేయ రతని ప్రజలు మెచ్చి
సత్వగుణము  చేత సజ్జనుండగునయా
విశ్వదాభిరామ వినురవేమ //

కోతి బట్టి తెచ్చి కొత్త పుట్టము గట్టి
కొండముచ్చు లెల్ల కొలిచినట్లు
నీతిహీను నొద్ద నిర్భాగ్యులుందురు
విశ్వదాభిరామ వినురవేమ //

కుండ పగిలెనేని కొత్తది కొనవచ్చు

కుండ పగిలెనేని కొత్తది కొనవచ్చు
భూతలంబు నందు పొందుగాను
కూలబడిన నరుడు కుదురుట అరుదయా
విశ్వదాభిరామ వినురవేమ //

కుక్క గోవు గాదు కుందేలు పులిగాదు
దోమ గజము గాదు దొడ్డదైన
లోభి దాతగాడు లోకంబు లోపల
విశ్వదాభిరామ వినురవేమ //

కుక్క యేమెరుంగు గురులింగ జంగంబు
పిక్క బట్టి యొడిసి పీకుగాక
సంతపాక తొత్తు సన్యాసి నెరుగునా
విశ్వదాభిరామ వినురవేమ //

కులము నీరు జేసి గురువును వధియింప
పొసగ నేనుగంత బొంకు బొంకె
పేరు ధర్మరాజు పెను వేపవిత్తయా
విశ్వదాభిరామ వినురవేమ //

కులములోన నొకడు గుణవంతు డుండెనా
కులము వెలయు వాని గుణము వలన
వెలయు వనములోన మలయజంబున్నట్లు
విశ్వదాభిరామ వినురవేమ //

కల్లు కుండకెన్ని ఘనభూషణము లిడ్డ

కల్లు కుండకెన్ని ఘనభూషణము లిడ్డ
అందులోని కంపు చిందులిడదె
తులువ పదవి గొన్న తొలిగుణ మేమగు
విశ్వదాభిరామ వినురవేమ //

కానలేడు నుదురు కర్ణముల్ వీపును
నెరులు గానలేడు  నెత్తిమీద
తన్నే కానలేడు తత్వమే మెరుగురా
విశ్వదాభిరామ వినురవేమ //

కానివాని తోటి కలిసి వర్తించెనా
హాని వచ్చు నెంతవానికైన
తాటి క్రిందపాలు తాగిన చందమౌ
విశ్వదాభిరామ వినురవేమ //

కాశి నీళ్ళు మోసి కాళ్ళు మొగము వాచి
ఎందు సుఖములేక ఎండి యెండి
చచ్చి  వెనుక ముక్తి సాధింపగలరొకో
విశ్వదాభిరామ వినురవేమ //

కుండ కుంభమండ్రు కొండ పర్వత మండ్రు
ఉప్పు లవణమండ్రు ఒకటిగాదె
భాషలింతె  వేరు పరతత్వ మొక్కటే
విశ్వదాభిరామ వినురవేమ //

కుండ చిల్లి పడిన గుడ్డ దోపగవచ్చు
పనికి వీలు పడును బాగుగాను
కూలబడిన నరుడు కుదురుట అరుదయా
విశ్వదాభిరామ వినురవేమ //

కనియు గానకుండు కదలింపడా నోరు

కనియు గానకుండు కదలింపడా నోరు
వినియు వినకయుండు విస్మయమున
సంపదగలవాని సన్నిపాతంబది
విశ్వదాభిరామ వినురవేమ //

కనులు లేనివాడు కాళ్ళుపోయునవాడు
ఉభయు లరయ గూడియుండునట్లు
పేదపేద గూడి పెనగొని యుందురు
విశ్వదాభిరామ వినురవేమ //

కన్నులందు మదము గప్పి కానరుగాని
నిరుడు ముందటేడు నిన్న మొన్న
దగ్ధులైనవారు తమకంటె తక్కువా?
విశ్వదాభిరామ వినురవేమ //

కసరు దినును గాదె పసరంబులెప్పుడు
చెప్పినట్టు వినుచు సేయు పనులు
వాని పాటియైన మానవు డొప్పడా
విశ్వదాభిరామ వినురవేమ//

కర్ణుడొకడెగాని ఘనులెవ్వరును లేరు
దానశీలుడంచు దలప బడను
తలప ధనము కర్ణు దాతను జేసెను
విశ్వదాభిరామ వినురవేమ //

కలిమినాడు నరుడు కాన్పు మదమున
లేమినాడు పెట్ట లేదు మొదలె
కలిమి లేమి లేని కాలంబు కలుగునా
విశ్వదాభిరామ వినురవేమ //