ఓగు నోగు మెచ్చు నొనరంగ నజ్ఞాని

ఓగు నోగు మెచ్చు నొనరంగ నజ్ఞాని
భావమిచ్చి మెచ్చు పరమలుబ్ధు
పంది బురదమెచ్చు పన్నీరు మెచ్చునా
విశ్వదాభిరామ వినురవేమ //

ఓర్పులేని భార్య యున్న ఫలంబేమి
బుద్ధిలేని బిడ్డ పుట్టి యేమి
సద్గుణంబు లేని చదువది యేలరా
విశ్వదాభిరామ వినురవేమ //

కంకుభట్టనంగ కాషాయములు గట్టి
కొలిచె ధర్మరాజు కోరి విరటు
కాలకర్మగతులు కనిపెట్టవలెనయా
విశ్వదాభిరామ వినురవేమ //

కట్టెయందు నిప్పు గానని చందాన
తనువునందు నాత్మ దగిలియుండు
మరుగు దెలిపి పిదప మార్కొన వలెనయా
విశ్వదాభిరామ వినురవేమ //

కడక నఖిలమునకు నడినాళ మందున్న
వేగుచుక్క వంటి వెలుగు దిక్కు
వెలుగుకన్న దిక్కు వేరెవరున్నారు
విశ్వదాభిరామ వినురవేమ //

కనక పర్వతమున కాపురంబుండిన
అనిమిషేశ్వరునకు ఆస పోదు
కనక కుండలములు కర్ణుడి అడుగడా
విశ్వగాభిరామ వినురవేమ //