ఎలుక తోలు తెచ్చి ఏడాది వుతికినా

ఎలుక తోలు తెచ్చి ఏడాది ఉతికిన
నలుపు నలుపె కాని తెలుపు రాదు
కొయ్య బొమ్మ దెచ్చి కొట్టిన పలుకునా
విశ్వదాభిరామ వినురవేమ //

ఏమి గొంచు వచ్చె ఏమి తాగొనిపోవు
పుట్టువేళ నరుడు గిట్టువేళ
ధనము లెచటి కేగు తానేగు నెచటికి
విశ్వదాభిరామ వినురవేమ //

ఏరుదాటి మెట్టకేగిన పురుషుడు
పుట్టి సరుకు గొనకపోయునట్లు
యోగపురుషు డేల యొడలు పాటించురా
విశ్వదాభిరామ వినురవేమ //

ఐకమత్యమొక్క టావశక్యం బెప్డు
దాని బలిమి నెంత యైనకూడు
గడ్డి వెంటి బెట్ట కట్టదా యేనుంగు
విశ్వదాభిరామ వినురవేమ //

ఒడలు బూది బూసి జడలు ధరించిన
ఒడయడైన ముక్తి బడయలేడు
తడక బిర్రుబెట్ట తలుపుతో సరియౌనె
విశ్వదాభిరామ వినురవేమ //

ఒడ్డు పొడుగు గలిగి గడ్డంబు పొడుగైన
దానగుణము లేక దాత యగునె
ఎనుము గొప్పదైన ఏనుగు బోలునా
విశ్వదాభిరామ వినురవేమ //