అంతరంగమందు

అంతరంగమందు అపరాధములు జేసి
మంచివాని వలెను మనుజుడుండు
ఇతరు లెరుగకున్న ఈశ్వరుడెరుగడా
విశ్వదాభిరామ వినురవేమ//

అంతరంగమందు అభవునుద్దేశించి
నిలిపి చూడచూడ నిలుచుగాక
బాహ్యమందు శివుని భావింప నిలుచునా
విశ్వదాభిరామ వినురవేమ//

అడవి దిరుగ జిక్క దాకసమునలేదు
అవని తీర్థయాత్రలందు లేదు
ఒడలు శుద్ధిచేసి ఒడయని చూడరా
విశ్వదాభిరామ వినురవేమ//

అదిమి మనసు నిలిపి ఆనందకేళిలో
బ్రహ్మమయుడు ముక్తి బడయగోరు
జిహ్వరుచులచేత జీవుండు చెడునయా
విశ్వదాభిరామ వినురవేమ//

అధికుడైన రాజు అల్పుని చేబట్ట
వాని మాట చెల్లు వసుధ లోన
గణకు లొప్పి యున్న గవ్వలు చెల్లవా?
విశ్వదాభిరామ వినురవేమ//