మాయ లోన బుట్టి మాయలోన బెరిగి

మాయ లోన బుట్టి మాయలోన బెరిగి
మాయ దెలియలేని మనుజుడేల
మాయ దెలియువాడు మహి మీద ధన్యుండు
విశ్వదాభిరామ వినురవేమ//

మిరెపుగింజ చూడ మీద నల్లగ నుండు
కొరికి చూడలోన చురుకు మనును
సజ్జను లగువారి సార మిట్లుండురా
విశ్వదాభిరామ వినురవేమ //

మురికిలోన బుట్టి మురికిలోన బెరిగి
మురికి తనువు కింత మురిపెమేల
మురికెరుంగ నతడు మురికిలో బుట్టునా
విశ్వదాభిరామ వినురవేమ //

ముక్తిగానలేని మూర్ఖజనులకెల్ల
బట్టబయలు జేసి పరమపదము
దారిజూపు ఘనుడు దైవంబు గాదొకో
విశ్వదాభిరామ వినురవేమ //

ముచ్చు యాత్రకేగి ముల్లె విడుచుగాని
మొక్క పొద్దు లేదు మొనసి యెపుడు
కుక్క యిల్లు సొచ్చి కుండలు వెదకదా
విశ్వదాభిరామ వినురవేమ//

మూఢభక్తి చేత ముక్కంటి పూజింప
మొన్న బోయవాడు ముక్తుడాయె
పూజకేమి తనదు బుద్ధి ప్రధానంబు
విశ్వదాభిరామ వినురవేమ//